Sámi servodat rievdá

Juohke servodat rievdá. Dan dahká maiddái sámi servodat. Sámi servodat mii álggus lei, ii leat seammalágán go dat sámi servodat mii otne doaibmá. Dat lea rievdan ja dádistaga ain rievdá, muhto datte bistá.

Servodat rievdá dánne go servodahkii bohtet ja riegádit ođđa olbmot ja jurdagat. Sii ovddidit ođđa eallinvuogiid ja hutket ođđa reaiddiid ja teknologiija. Muhtimat ohcet amas servodagaid. Dopppe servvoštallet eará álbmogiiguin ja ohppet ođđa vieruid ja dábiid. Sii heivehit ođđa vieruid ja dábiid iežaset eallindillái. Maid dái amas guovlluin bohtet olbmot Sápmi ja ohppet sámegiela, duddjot, juoigat ja sámiid kulturra dovdat. Nu rivedet sámegiella, sámi kulturra, duodji, luođit ja oba sámi servodat. Dat lea áibbas lunddolaš.

Muhtimat ballet ahte sámegiella, sámi eallinvuogit ja sámi árbevirolaš máhttu jávket. Jos sámit beroštit sámi servodaga iešvuođaid ealáskahttimis ja ovdáneamis, de dat eai jávkka, muhto rivdet ja ođasmahttojit.

Identitehta ja kultura

Olbmuid ovttastallan dahká servodaga, muhto juohke olmmoš leat su iešvuođat ja su iežas oaivilat, beroštumit ja doaimmat dan servodagas.

Gii lean mun? Leat go jurddašan dan birra gii don leat? Don leat erenoamáš, ja ii oktage máilmmis leat nu mo don. Ii oktage leat vástid juohke dan seamma go don, ja ii oktage leat riegádan seamma iešvuođaiiguin go don.

Identitehta

Don leat don, muhto don it leat okto. Mii gullat muhtin bear-rášii ja jovkui, mii ássat dihto guovllus ja mis leat iešgudet beroštumit ja doaimmat. Du iešvuodat ja luondu maid don ožžot go riegádit, guovlu gos don ásat, olbmot geaid deaivvat ja doaimmat maidda don oassálasttát, mearridit makkárin don šattat. Dat leat mielde huksemin du identitehta ja ráhkadeamen DU. Min identitehta lea čádnon servodatrolleide. Muhtimin leat skihpár, eará háve fas oahppi, ja muhtimin nieida dahje bárdni. Dáid gaskkas mii lonuhallat máŋgi beaivái. Iešgudet rollat gáibidit ahte mii dovdat daid vuordámušaid ja gáibádusaid.

Nuorehdiggi