Mii lea media ja gávpemedia?
Media lea latiinnalaš sátni ja mearkkaša: Gasku. Dat leat TV, radio, áviissat, girjjit, bládit, áigečállagat, smartphone, DVD, blu-ray, e-girjjit, sosiála neahttabáikkit ja eará neahttasiiddu. Visot dát leat oassin min eallimis, iđidis gitta eahkedii, juohke beaivvi. Maiddái dát girji lea media.
Media bokte mii ožžut dieđuid maid dárbbašit ja oahppat ođđa áššiid. Media čuvge olmuid áššiid mat eai leat nu buorit servodagas, ja maid politihkkárat fertejit divvut. Dat lea muhtinlágan vákta mii geahččá bearrái ahte politihkkárat čáđahit dan maid leat lohpidan. Jos olbmot vásihtti eahpevuoiggalašvuoda servodagas, de mediat muitalit dan birra. Mii sáhttit gulahallat ja juogadit govaid, musihka ja dieđuid skihpáriiguin geat ássat nuppe geahčen máilmmi. Mii sáhttit geahččat TV ja filmaid goas midjiide heive. Mii sáhttit diŋgot ja oastit gálvvuid maid eat fidne iežamet guovllus.
Muhtin mediat čájehit máidnosiid, filmaid ja TV-ráidduid main sii dinejit ollu ruđa. Dat leat gávpemediat. Gávpemediat leat fámolaččat ja sáhttet garrasit váikkuhit dasa mo mii árvvoštallat ja oaidnit máilmmi. Dat sáhttet váikkuhit dasa mo mii gárvodit, mo mii láhttet ja makkár gálvvuid mii oastit.
Dihtet go?
... ahte Norggas leat golbma stáhtatfápmuásahusa.
Dat leat stuorradiggi (láhkaaddi fápmu), ráđđehus ja gonagas (láhkáčuovvuleaddji fápmu) ja duopmostuollu (dubmejeaddji fápmu). Muhtimat gohčodit media njealját stáhtatfápmuásahussan.
Manne nu, jáhkát don?
