Máilmmiviidosaš humanitára veahkkeorganisašuvnnat

Human mearkkaša olmmoš. Humanitára veahkkeorganisašuvnnat veahkehit olbmuid. Sii fállet heahteveahki jos deaividit luondduroasut ja soađit mat dagahit gillámušaid olbmuide ja vahágahttet sin dearvvašvuođa. Luondduroa sut sáhttet leat dulvvit, eanandoarggástusat dahje orkánat mat bilidit olbmuid dáluid ja johtolagaid ja botkejit elrávnnji. Muhtimin goiket ja gurbet eatnamat jos ii leat arván guhkes áigái, ja olbmuid gilvagat eai šatta. Dat fas mielddisbuktá ahte olbmot nelgot.

Image

Issoras garra orkána Filippiinnain skábmamánus jagi 2013. Orkána lei nu garas ahte dat njávkkastii visot dáluid ja huksehusaid ja bilidii geainnuid.

Dalle leat humanitára veahkkeorganisašuvnnat válbmasat vuolgit iežaset reaidduiguin dohko veahkehit olbmuid geat dárbbašit čázi, borramuša, biktasiid, ránuid, tealttáid, dálkasiid ja dearvvašvuođadivššu.

Sin bargit sáhttet orrut ja bargat luondduroasuid guovlluin guhká. Sii váldet mánáid eret guovlluin gos sáhttá leat váralaš orrut ja stoahkat. Ovttas guovllu olbmuiguin sii ceggejit skuvladáluid jođánepmosit go dalle sáhttet mánát dain orrut. Skuvllas ožžot veahki ja visot dieđuid maid dárbbašit. Go dáhpáhuvvet luondduroasut fáhkka, de sáhttet bearrašat bieđganaddat iešguđet guvlui ja eai šat gávnnat. Humanitára veahkkeorganisašuvnnat veahkehit bearašlahtuid gávnnadit fas.

Eanaš máilmmiviidosaš humanitára veahkkeorganisašuvnnain leat ossodagat maiddái Norggas.

Ovddit heahti ii geahča maŋit heađi

Image Gánddaš hirpmástuvvan. Buot su ávdnasat ja olles ruoktu leat billašuvvan orkána geažil.

Image Veahkkeorganisašuvnnat leat sajis dasttá. Sii juhket borramuša, čázi ja eará dárbašiid olbmuide geat leat gillán issoras luondduroasuid ja massán buot.