NATO
Ollu Norgga soalddáhat leat olgoriikkas soahtamin NATO-soalddáhin. Dá Afghanistánas.
NATO mearkkaša North Atlantic Treaty Organization, ja dat vuođđuduvvui jagi 1949. Dat lea searvi mii bargá suodjalusáššiin. Maŋŋá nuppi máilmmesoađi sohpe muhtin riikkat ahte sii veahkehit guđet guimmiid jos fas šattašii soahti. 28 Eurohpá ja Davvi-Amerihká riikka leat dán soahpamuša dohkkehan, ja šaddan NATO-miellahttun. Norga lea leamaš NATO-miellahttu dan rájes go NATO vuođđuduvvui.
Sin soahpamušas čuožžu ahte sii leat geatnegahtton veahkehit guđet guimmiid jos eará riikkat fallehit. Riikkat galget dalle soalddáhiid, soahtefievrruid, vearjjuid ja eará soahtereaidduid buktit ja oassálastit soahtái. NATO oassálastá dávjá soahtediliide máilmmis. Dalle galgá maiddái Norga sáddet soalddáhiid ja reaidduid daidda riikkaide gos sohtet. NATO bargá ovttas maiddái riikkaiguin mat eai leat NATO-miellahtut.