ON
Muhtin áššiid eat sáhte Norggas ja Sámis okto čoavdit. Dat leat áššit dego soađit, luondduroasut, báhtareapmi, dálkkádat rievdan, vearredahkan ja gávppašeapmi. Buot máilmmi riikkat ja álbmogat fertejit ovttas bargat ja veahkehit guđet guimmiid buoridit diliid máilmmis nu ahte dat šattašii buorebun buohkaide. Danne muhtin organisašuvnnat barget ovttas máilmmiviidosaččat. Dákkár organisašuvnnat leat ovdamearkka dihtii ON, humanitára veahkkeorganisašuvnnat, suodjalanorganisašuvnnat, gávppašanorganisašuvnnat ja máilmmi eamiálbmogiid organisašuvnnat.
ON leavga. Leavggas oainnát máilmmekártta man olivenoavssit birastit. Olivenoavssit lea ráfi symbola, ja máilmmekárta symbolisere máilmmi álbmogiid.
ON
ON lea oanádus ja mearkkaša: Ovttastuvvan Našuvnnat. Dat fas mearkkaša ahte ollu riikkat miehtá máilmmi leat oktii searvan ovtta stuora searvái, bargat ovttas. Sii ásahit ovttas lágaid ja njuolggadusaid maid buot riikkat galggašedje čuovvut. Sii geahččalit čoavdit riidduid mat bohciidit riikkaid gaskkas. Sii gehččet bearrái ahte riikkaid eiseválddit
čuvvot olmmošvuoigatvuođaid. ON lea máilmmiviidosaš organisašuvdna ja measta buot máilmmi riikkat leat ON:a miellahtut. ON vuođđuduvvui golggotmánu 24. beaivvi jagi 1945. Lei seammá jagi go nuppi máilmmisoahti nogai.
Norga lea ON:a miellahttu. Dat mearkkaša ahte Norga beassá leat mielde čoahkkimiin ja šiehtadallamiin. Norgga ráđđehus ja sámediggi válljejit olbmuid geat galget ovddastit Norgga ON:a čoahkkimiin ja šiehtadallamiin. Dán láhkai sii váikkuhit dasa mo ON buoremusat galgá veahkehit máilmmi riikkaid buoridit iežaset álbmoga dili. Dat sáhttá leat skuvllaid hukset, ráfi bisuhit, bistevaš oahpu fállat ja nuvttá dearvvašvuođadivššu buohkaide fállat. Dán láhkai sáhttet olbmot beassat eret geafivuođas ja ieža birgegoahtit.
ON:s leat máŋga vuolle-organisašuvnna mat iešguđet láhkai barget buoridit olbmuid eallima. Muhtimat dain leat olmmošvuoigatvuođaid komitea, ILO konvenšuvdna ja ONa dálkkádatpanela.
Bajit: ON-gárdin New Yorkas.
Vuolit: ON:a máilmmeráđđi. Deike čoahkkanit ON-lahtuid riikkaid
ovddasteaddjit ságastit ja čoavdit riidduid.
Dihtet go?
... ahte vuosttaš ON-jođiheaddji lei norgalaš ja politihkkár Trygve Lie.