Stuorradiggi lea Norgga bajimus mearrideaddji ásahus. Doppe čohkkájit sii geat stivrejit ja mearridit Norggas. Sii leat 169 politihkkára, ja leat olles riikka álbmoga gaskkas válljejuvvon. Sin mii gohčodit stuorradiggeáirrasin.

Stuorradiggi mearrida mo riika galgá jođihuvvot ja stivrejuvvot. Olbmot Norggas fertejit leat deavdán 18 jagi ja leat Norgga stáhtaássit ovdal go sáhttet jienastit politihkkáriid geaid sii dáhttot galget mearridit sin ovddas. Válggat čadahuvvojit juohke njealját jagi. Politihkalaš bellodagat mat ožžot ollu jienaid, ožžot eambbo áirasiid Stuorradiggái. Politihkalaš bellodagat main leat ollu áirasat, sáhttet álkit oažžut eanetlogu iežaset evttohusaide, go Stuorradikkis čadahuvvojit jienasteamit. Gonagas ráhpá Stuorradikki ođđa bargojagi álo vuosttaš árgga golggotmánus. Dalle son doallá sártni mii gohčoduvvo ruvdnosárdnin.

Stuorradiggegárdin lea Oslos.

Stuorradikki doaimmat

Stuorradikki deháleamos bargu lea dohkkehit lágaid. Ráđđehus bukta evttohusaid ođđa lágaide, dahje evttoha láhkarievdadusaid. Stuorradiggi digaštallá evttohusaid ja jienasta. Go láhka lea dohkkehuvvon Stuorradikkis, de dat sáddejuvvo gonagassii, gii čállá vuollái.

Norgga ássit mákset ollu divadid Norgga stáhtii. Stuorradiggi galgá mearridit masa dát ruđat galget geavahuvvot. Muhtin oassi ruđain mannet skuvllaide, mánaidgárddiide, buohcceviesiide, boarrásiidsiiddaide, ođđa geainnuid, iešgudet mediaide, birasgáhttendoaimmaide, Sámediggái ja ollu, ollu eará doaimmaide.

Stuorradiggi ferte juohke čavčča čoahkkanit digaštallat masa ruđaid galgá geavahit. Sii eai leat álo ovttaovilis dása mo stáhta galgá ruđaid geavahit buoremusat. Loahpas sii evttohit našunála bušeahta. Áirasat galget de jienastit, ja loahpas Stuorradiggi dohkkeha bušeahta. Buohkat galget de čuovvulit dan maid eanetlohku lea mearridan.

Stuorradiggi galgá maid geahččat bearrái ahte ráđđehus bargá dan maid Stuorradiggi lea mearridan.

Stuorradiggi lea čoahkkanan digaštallat.

Ráđđehus

Norggas mearrida stáhtaministtar buot eanemusat. Stáhtaministar gullá dábálaččat dan politihkkalaš bellodahkii mii oaččui eanemus jienaid stuorra-diggevággas. Norggas leat leamaš ollu stáhtaministarat.

Stáhtaministtar ii stivre riikka áibbas okto. Son galgá váljet mielbargiid, sihke nissoniid ja albmáid geat stivrejit iešguđet suorggis. Juohke mielbargi mii gohčodit namain stáhtaráđđi.

Muhtin stáhtaráđđi stivre olgoriikkaáššiid, ja nubbi eará fas oahpahusáššiid, fas nubbi eará stivre ruđaid. Dát gohčoduvvojit olgoriikkaministtarin, oahpahusministtarin ja finánsaministtarin. Stáhtaministtara ja su mielbargiid mii gohčodit namain ráđđehus.

Ráđđehus geahččala ovddidit iežas áigumušaid. Dat evttoha ođđa lágaid ja rievdadusaid daid lágaide mat leat vai olbmuide šaddá buorebun eallit servodagas. Stuorradiggi dohkkeha lágaid. Ráđđehus galgá geahččat bearrái ahte servodat doaibmá daid lágaid ja mearrádusaid mielde maid Stuorradiggi lea dohkkehan ja mearridan.

Gonagas deaivvada ráđđehusain juohke bearjadaga dii 11.