Politihkaláš bellodagat

Politihkkárat ásahit joavkkuid maid mii gohčodit politihkaláš bellodahkan. Sii ráhkadit joavkkuid daid áššiid vuođul mat sidjiide leat dehálaččat servodagas.

Muhtin politihkkárat oaivvildit ahte skuvlamánát galget oažžut liegga mállásiid juohke beaivvi skuvllas. Earát fas oaivvildit ahte dása mii eat sáhte geavahit ruđaid go skuvlaviesut ja buohcceviessut leat nu fuonit ahte leat gahččamin čoahkkái. Sin áigumuš lea divvut ja hukset odda skuvlaviesuid ja buohcceviessuid. Earát fas háliidit ahte guovllu olbmot galggašedje friddja beassat mohtorfievrruiguin johttit meahcis. Fas earát lohpidit ahte sii áigot heaittihit ruvkedoaimmaid mat nuoskkidit luondddu eatnamiid ja čázádagaid. Dán láhkai politihkkárat geahččalit oažžut olmuid jienastit sin bellodaga.

Juohke politihkaláš bellodagas lea prográmma mii muitala mo bellodat háliida ahte servodat galgá šaddat ja leat. Ollugat dorjot ovtta bellodaga go sii leat dainna ovttaoaivilat. Dalle sáhttet šaddat bellodaga miellahttun. Dan sii dábálaččat maid jienastit go leat válggat.

Gii ollu sárdnu,
ollu šaddá vástitdit.