Doabbariid meannudit

Mis báhcet beaivválaččat ávdnasat, garat, borramušat ja skoađđásat maid eat dábbáš dahje mat guohcagit. Dat leat doabbarat, ja daid mii bálkestit doapparlihtái. Leat go smiehttan gosa doabbarat šaddet? Doapparbiila gurre doapparlihti juohke vahkus. Sii devdet guorbmebiilla doabbarii guin, ja gurrejit dan doapparduvdnái maid eiseválddit leat ásahan ja dohkkehan dohkálaš doapparbáikin. Doapparbáikkis bargget ollu olmmoit. Muhtimat váldet vuostá buot doabbariid ja earát fas vudjet stuorra mašiinnain ja dulbmet doabbariid. Muhtin doabbariid ii leat lohpi bálkestit doapparduvdnái. Dain sáhttet leat váralaš ávdnasat mat bílidit luonddu. Dákár doabbariin fertet vuos váldit eret dan váralaš ávdnasa ja dan ferte meannudit sierraláhkái vai ii bilit luonddu.

Doabbariid maid ii sáhte oddasit geavahit, sáhtta boaldit stuorra oapmaniin. Lieggasiin mii das šaddá, sáhtta fas ligget ollu dáluid.

Muhtin doabbariid sáhttá ođđasit geavahit

Doapparhivvodat lea menddo sakka sturron manjmuš áiggid. Ii leat šat sadji vurket buot doabbariid. Eiseválddit leat ásahan doaimmaid mat galget unnidit doapparhivvoda. Dál leat ášahuvvon báikkit gosa olbmot sáhttet bidjat guoros skoaddasiid. Alumiidna, bábir, plastihkka, glássa dahje láse ja ollu eará ávdnasat sáhttet šaddat ođđa ávnnasin fas. Borramušbázahusat eanaluvvet, ja eai leat vahágin lundui. Dán láhkaí mii sáhttit hehttet doapparhivvoda šaddamis, ja muhtin ávdnasat šaddet ođđa ávnnasin.

Doappársirren. Muhtin doabbariid sáhttá geavahit ođđasit.

Báhpáris sáhttá ráhkadit ođđa báhpára.