Servodaga rollat

Mii diehtit ahte teáhterneavttáris leat máŋga rolla. Muhtimin son lea gánda, eará háve son lea politiija ja fas eará háve son lea eadni. Seammá láhkai lea dus maid. Dus leat máŋga rolla servodagas. Dál don várra leat oahppi, muhto ruovttus don leat mánná dahje gánda dahje nieida. Eará háve leat skihpár, mánaidmánná dahje neahpi.

Muhtin rollaid eat sáhte ieža válljet. Daidda leat mii riegádan. Dat leat sohkabeallerolla ja čearddalaš rolla. Don riegádat gándan dahje nieidan ja sápmelažžan, suopmelažžan dahje arábialažžan.

Eará rollaid mii guoddít ja muhtin rollaid oažžut dadistaga go stuorrut. Dál don leat ain mánná, muhto muhtin jagiid geahčen leat nuorra.

Muhtin rollaid váljjet ieža. Rávisolbmuid rolla lea dávjá dan mielde makkár virgi dahje bargu sis lea. Snihkkár, badjeolmmoš, duojár ja buvdabargi leat dákkár rollat. Go eai leat barggus dahje doaimmas, de leat sis eará rollat. Eadni sáhtta leat barggus direktavran, muhto friddjaáiggis son lea eadni, eamit dahje elošteaddji, skihpár dahje govvejeaddji. Servodatrollat leat olbmuid doaimmat servodagas.

Govvejeaddji

Nieiddat ja gánddat

Servodagas leat guokte sohka-bealli, nissonbealli ja almmáibealli. Servodagas ollugat vurdet ahte mii doaibmat dan mielde mii lea leamaš ja lea ain dábálaš sohkabeallái. Muhtin áššiid servodagas doaimmahit dábálaččat nissonat ja muhtin áššiid servodagas doaimmahit dábálaččat albmát dahje dievdudut. Dán mii gohčodit namain: sohkabeallerollat.

Muhtimat válljejit dahkat eará go dan maid servodat vuordá sohkabeallerollas. Lea buorre servodahkii ahte mii geahččalit doaimmahit áššiid mat eai leat dábálaččat sohkabeallái. Dalle leat mii mielde rievdadeamen servodaga danne go muhtin doaimmaid ja bargguid sáhttet guktot sohkabealit bargat.

Nisu bargá mekanihkkárin.